ଧମକ ସହ ୧ଲକ୍ଷ ଟଙ୍କା ଦାଦାବଟି ଅଭିଯୋଗ, ହାତୀ ସହ ୩ଗିରଫ

ପୁରୀ ବଳିଆପଣ୍ଡା ବିଧବାଶ୍ରମ ଛକ ସ୍ଥିତ ହୋଟେଲରେ ପଶି ଧମକ ଦେବା ସହ ମାସକୁ ଦାଦାବଟି ୧ଲକ୍ଷ ଟଙ୍କା ଦାବି କରିବା ଅଭିଯୋଗରେ ବଳିଆପଣ୍ଡା ଥାନା ପୁଲିସ ୩ଜଣକୁ ଗିରଫ କରି କୋର୍ଟ ଚାଲାଣ କରିଛି l ଅଭିଯୁକ୍ତମାନେ ହେଲେ ଗୌଡ଼ବାଡ଼ ସାହିର ହାତୀ ଓରଫ ଜମ୍ବେଶ୍ୱର ମହାନ୍ତି ୫୬, ବଳିଆପଣ୍ଡା ଜନମଙ୍ଗଳ ସମିତି ଲେନର ଜଗୁ ଓରଫ ଭଗବାନ ଶତପଥି ୨୯ ଓ ସଦର ଥାନା ଅନ୍ତର୍ଗତ ଜଗନ୍ନାଥ ପାଟଣାର ପଶା ଓରଫ ପ୍ରଶାନ୍ତ ସ୍ୱାଇଁ ୩୧ l ଅଭିଯୁକ୍ତ ମାନଙ୍କ ନିକଟରୁ ଗୋଟିଏ ଛୁରୀ ଜବତ କରିଛି ପୁଲିସ l ପୁଲିସ ସୂତ୍ରରୁ ଜଣାଯାଇଛି ଯେ ବଳିଆପଣ୍ଡା ବିଧବାଶ୍ରମ ଛକ ସ୍ଥିତ ଥିବା ଏକ ହୋଟେଲର ମାଲିକ ରଘୁନାଥ ମିଶ୍ର ଗତ ରବିବାର ଅପରାହ୍ନରେ ଥାନାରେ ଅଭିଯୋଗ କରିଥିଲେ l ସେ ଅଭିଯୋଗ କରିଥିଲେ ଯେ ଉକ୍ତ ଦିନ ତାଙ୍କ ହୋଟେଲରେ ମ୍ୟାନେଜର ସୁବ୍ରତ ମାର୍ଥା ଓ ବିଶ୍ୱନାଥ ମିଶ୍ର ହୋଟେଲରେ ଉପସ୍ଥିତ ଥିଲେ l ଏହି ସମୟରେ ଅଭିଯୁକ୍ତ ଜଗୁ ଓ ପଶା ହୋଟେଲକୁ ଯାଇ ଧକମ ଚମକ ଦେଇଥିଲେ l ଏଠାରେ ଯେଉଁମାନେ ଘର କିମ୍ବା ହୋଟେଲ ନିର୍ମାଣ କରନ୍ତି ସେମାନେ ଦାଦାବଟି ଦିଅନ୍ତି l ତମେମାନେ ମାସକୁ ୧ଲକ୍ଷ ଟଙ୍କା ଦେବାକୁ ପଡିବ କହି ଧମକାଇ ଥିଲେ l ଏଥିସହ ଆମେ ହାତୀ ମହାନ୍ତି ଓ ତାଙ୍କ ପୁତ୍ର ଚନ୍ଦନ ମହାନ୍ତି ଗ୍ରୁପର l ଯେଉଁମାନେ ଏଠାରେ ନିର୍ମାଣ କାର୍ଯ୍ୟ କରନ୍ତି ସେମାନେ ଏହି ଗ୍ରୁପକୁ ଟଙ୍କା ଦିଅନ୍ତି l ଏ ନେଇ ଶ୍ରୀ ମିଶ୍ରଙ୍କ ଅଭିଯୋଗ କ୍ରମେ ୨୧୯/୨୦୨୫ନମ୍ବର ମାମଲା ରୁଜୁ କରାଯାଇ ଅଭିଯୁକ୍ତ ମାନଙ୍କୁ ଗିରଫ ପରେ ମଙ୍ଗଳବାର କୋର୍ଟ ଚାଲାଣ କରାଯାଇଥିଲା l